సిడ్నీ క్రికెట్ గ్రౌండ్లో ఆస్ట్రేలియాతో జరిగిన మూడవ వన్డేలో భారత కెప్టెన్ రోహిత్ శర్మ అద్భుతమైన ప్రదర్శనతో తన 50వ అంతర్జాతీయ శతకం నమోదు చేశాడు. ఇది అతని వన్డే క్రికెట్లో 33వ సెంచరీ కాగా, మొత్తంగా అన్ని ఫార్మాట్లలో కలిపి 50 శతకాల మైలురాయిని చేరాడు. ఈ ఘనత సాధించిన ప్రపంచంలో పదో ఆటగాడిగా రోహిత్ నిలిచాడు.
రోహిత్ ఇన్నింగ్స్లో ఏకంగా 11 బౌండరీలు, 4 సిక్సులు ఉన్నాయి. అతనితో పాటు విరాట్ కోహ్లీ 74 పరుగులు చేసి అద్భుతంగా ఆడి మరో రికార్డు సృష్టించాడు. కోహ్లీ, శ్రీలంక దిగ్గజ ఆటగాడు కుమార్ సంగక్కరను అధిగమించి వన్డేల్లో రెండో అత్యధిక పరుగులు చేసిన ఆటగాడిగా నిలిచాడు. ప్రస్తుతం కోహ్లీ 14,235 పరుగులతో రెండో స్థానంలో ఉండగా, సచిన్ టెండుల్కర్ 18,426 పరుగులతో అగ్రస్థానంలో కొనసాగుతున్నాడు.
రోహిత్–కోహ్లీ జోడీ రెండో వికెట్కి 210 పరుగుల బలమైన భాగస్వామ్యాన్ని నిర్మించారు. ఇది 2020 తర్వాత ఈ జంటకు వచ్చిన తొలి శతక భాగస్వామ్యం కావడం విశేషం. వీరి ప్రదర్శనతో భారత్ 237 పరుగుల లక్ష్యాన్ని కేవలం 38 ఓవర్లలోనే చేధించింది. ఈ విజయంతో భారత్ సిరీస్ వైట్వాష్ తప్పించుకుంది.
మ్యాచ్ అనంతరం రోహిత్ మాట్లాడుతూ, “జట్టుకు కావాల్సిన సమయంలో పెద్ద ఇన్నింగ్స్ ఆడడం ఎప్పుడూ సంతోషమే. 50వ సెంచరీ సాధించడం ప్రత్యేకంగా అనిపిస్తోంది. కోహ్లీతో మరోసారి పెద్ద భాగస్వామ్యం రావడం టీమ్ ఆత్మవిశ్వాసాన్ని పెంచింది” అని తెలిపారు. ఇక కోహ్లీ ఈ విజయాన్ని అభిమానులకు అంకితం చేస్తూ, “ఇది మనిద్దరి చివరి ఆస్ట్రేలియా పర్యటన కావచ్చు, అందుకే దీన్ని స్మరణీయం చేసుకున్నాం” అని వ్యాఖ్యానించాడు.
